وش احسن مويه عندنا

[ابو شوشه]

السلام عليكم جميعا

الموضوع هذا لعب في حسبتي له أكثر من ثلاث ساعات وربع وما لقيت حل له

يا عالم مو من حقنا نشرب أحسن مويه

كل ما شريت مويه القى طعمها يختلف عن الطعم المويه الثانيه وش الحل

قلت ابي اشتري مويه أكوافينا الي تنتجها شركه بيبسي



صارو يعبون المويه من البزبوز يعني البازان او بمصطلح أخر الحنفية



اتصلت على الهرش وقال لي ياخي انا اشرب موية من الترمس الترمس الأزرق طعم والذ من مويه الترمس الأحمر



واتصلت على صديقي الثاني صديقي الصدوق الي كل يوم يواعدني يسفرني للمغرب واخرتها يقول معك سلف

سألته وقال ياخي خلك مع مويه تنورين وما قدامك الا العافيه قلت له طيب وش رايك في مويه نستله قال لي ياخي احس ان طعمها حليب <==== موسوس


وش الحل في نظركم

انتظر ردودكم

[abufuzan]

ههههههههه

والله ودي اخدمك في هذا الموضوع بس انا متخصص في الشاهي هاليومين ..

اعذرني ما دام الترمس الازرق يختلف عن البردقاني ما اقدر اخوض في تفاصيل المياه حتى لا اغرق

موضوعك الحقيقة فيه ترف واضح وفكرة جميلة ..

المشكلة حتى المياه المعبأة ارتفع سعر جملتها وعلى حساب البقال المسكين ..

محبكم

[ابو شوشه]

والله ودي اخدمك في هذا الموضوع بس انا متخصص في الشاهي هاليومين ..

ايه اشوفك تحط دبل اكياس لبتن الشاهي في الكاس
يا جعله بالعافيه

اعذرني ما دام الترمس الازرق يختلف عن البردقاني ما اقدر اخوض في تفاصيل المياه حتى لا اغرق

وش اسوي هذا ترمسكم مهوب ترمسنا عشان تخوض في التفاصيل

وبعدين انت داخل ساقي*

موضوعك الحقيقة فيه ترف واضح وفكرة جميلة ..

الا والله مشكله مع المويه
مره من المرات شريت مويه الهداء وشافني احد الزملاء المشهود عليه بالدشاره وقالي وش الي معك ممنوعات قلت له يا جعل الممنوعات تنشب في خشمك

والله مشكله انت فكر معي كيفية بلورة الموضوع الي بلوره

<====== يا شين الفلسفه


*( عباره عن مجرى مويه تجري المياه او بعباره اخرى ينحدر الماء فيها )

ترى العلامه للي فوق مثل الكتب انا ووجهي

تحياتي لك

[ابو يمن]

شوف ياحبيبي ابو شوشه ولو اني اعتقد انك اصلع ماعندك ولا شعره في راسك

والله مافي احسن من موية زمزم وبعدها موية الزير المبخر وبدهم موية الشربه مع قليل من ماء الكادي وسلامتكم

ابو يمن يحيي ابو شوشه المنكوشه

[ابو شوشه]

شوف ياحبيبي ابو شوشه ولو اني اعتقد انك اصلع ماعندك ولا شعره في راسك

والله مافي احسن من موية زمزم وبعدها موية الزير المبخر وبدهم موية الشربه مع قليل من ماء الكادي وسلامتكم

ابو يمن يحيي ابو شوشه المنكوشه

تصدق ان شعري صاك اذاني من طوله

اكيد مويه زمزم ما فيه احسن منها ما تصلنا مويه زمزم الا طالع فيها شجر وعشب

وعلى قوله القايل

مويه موووووووووووويه مويه بارد

<===== قام يغني

مشكور ابويمن على ردك اللطيف والجميل والذي اسعدني واشعر اني شارب عصير زنجبيل

[SS2008]

السلام عليكم اخي ابو شوشة
كيف حالك انشاء الله انك بخير
بالنسبة لسؤالك عن أحسن مويه انا اقولك وهي عندي في البيت (الفلتر ) أقصد الفلتر الكبير الذي يحوي اكثر من مرحلةللفلترة التي تركبه الشركات (ماودي اقول اسم الشركة عشان ماتصير دعاية ) والله انه كويس واسال مجرب ولاتسال طبيب
وشكرا

[ابو شوشه]

السلام عليكم اخي ابو شوشة
كيف حالك انشاء الله انك بخير
بالنسبة لسؤالك عن أحسن مويه انا اقولك وهي عندي في البيت (الفلتر ) أقصد الفلتر الكبير الذي يحوي اكثر من مرحلةللفلترة التي تركبه الشركات (ماودي اقول اسم الشركة عشان ماتصير دعاية ) والله انه كويس واسال مجرب ولاتسال طبيب
وشكرا

حلوه بس شف الفلتر بعد كم شهر بعدها تكره المويه

نبغى مويه زين الاشوام ما تشوفونهم حمران عطرانا

وحنى طاقتنا الشهابه والمشق

مشكووور وما قصرت على ردك الجميل

[alasmari1382]

اقول دور موية ابيار صالحة للشرب ازين واصح

[ابو شوشه]

اقول دور موية ابيار صالحة للشرب ازين واصح

قول حبيبي قول

وين ادور فيه الرياض وش تحفر ما تصلح مويه ابار الرياض ما تشوف طالع عندنا نهر

تحياتي لك

[سيف الله المسلول]

احسن موية بابوشوشة موية بير حافريينة جنب بيتنا مافية الذ من مويتة كان تبي يابوشوشة بمد لك لي على بيتكم

[فوكس]

احسن مويه تشربها يابو شوشه مويه زمزم

[اوكسجين]

مويه ابو91 احسن من مويه 95 وارخص بس بعد ماتشرب لا تتكرع والزيجاره بفمك
هههههههههههههههههههههه

[ابو شوشه]

اشكركم على ردودكم

بس الي الحين ما وصلنا الي حل

هل المويه التي نشربها صحيه ميه بالميه يعني اكس بيرفن

ما اقول الا الله يكون في العون جانا اليورانيوم تحصله في المويه في الخضره حتى في اللحم
وش الحل
حتى كتاب ابله نظيره وصلها اليورانيوم ما سلم منه

ما فيه شخص عطاني حل الا الكل يقول مويه زمزم
مويه زمزم مو بالساهل نحصل عليه
انا اريد حل يحل جميع الحلول والشوائب

<==== ضيع الدرب

ما قصرتو على تفاعلكم مع الموضوع

واهم شي المويه يا جماعه الخير

انصحكم بتقوى الله وطاعه الوالدين وشرب المويه بكثره

[abufuzan]

*( عباره عن مجرى مويه تجري المياه او بعباره اخرى ينحدر الماء فيها )

هذا هامش الرد من الاخ ابو شوشة يشرح فيه معاني كلمة ساقي ..

ولمعلوميتك ترى اخوك متخصص في السواقي بعد ..

تصدق اني كنت اصيد ضفادع وانا صغير في السواقي ..

يعني المويه اللي نشربها كانت في يوم من الايام بانيو للضفادع ..

محبكم