هذه قصيدة الشايب اللي أول مره يركب الطيارة ! شاعر من مدينة القريات شمال المملكة ! تناقلتها اجهزة الجوال عن طريق البلوتوث ؟
يقول فيها :-
ودعت ناجح من مطـار القريـات
يوم اركبونـا الطايـره وشلعتنـا
لفـت ودارت ومرقت بيـن لحظـات
لولا الكراسـي والمحـزم ربطتنـا
طارو بنا حمر العلابـي خواجـات
صغر العيـون وجيههـم هولتنـا
تكفا تشهد يافهـد وقـرا الآيات
الموت جانا والظـروف اجبرتنـا
جانا المضيف وقال وش في خدمات
قلـت نزلونـا ابطونـا موجعتنـا
من قبل اشوف الغيم دون السماوات
واليوم أشوفه يا فهد مـن تحتنـا
عزالله إني ماحسبـت الحسابـات
والله تـرا سيارتـي موصلتـنـا
يازين ممشا الأرض لوهي مسافات
لنـا بشعيـب مزهبيـن اقهوتنـا
وش جابني لطايـره والمطـارات
والله ماعود اركوبهـا إن نزلتنـا
لو تنفجر قامـة تذيـع المحطـات
رح عـاد دور قشنـا مـع جثثنـا
وسلامتكم :D ؛
القريات : مدينة في شمال المملكة .
وشلعتنا : أي طارت بنا بسرعة إلى أعلى .
ومرقت : أي مرت بسرعة خاطفه .
حمر العلابـي : أي رقبته حمراء من الخلف .
خواجـات : أي ليسوا عرب .
هولتنـا : أي اندهشنا أو التعجب .
مزهبيـن قهوتنا : أي مجهزين القهوة .
قشنـا : أي عفشنا أو العفش .
قام بنقل القصيدة والترجمه !
هاوي تصميم
رد مع اقتباس
اشكركم جميعاً على جهودكم
