بيشه

ياللي تلوم القلب في حب بيشه
ذق تمرها واشرب من زلال ماها

بيشة بها من كل خيرٍ وعيشه
صفري وبرني والشُكُّل من جناها

قد موّنت صقر الجزيره وجيشه
يوم البطون من المجاعه رغاها

دارٍ ماهي بيشه تراها وحيشه
دام الصواير ما اشمخت في سماها

احبها لاسال ترج بقشيشه
والسيل ريحه عابقٍ في ثراها

لاما بطح واديه تسمع وشيشه
مثل الحيايا لحنقت من عداها

يصفق بحرفه مثل صفق الدريشه
لاهبها ريحٍ بعيد مداها

لا ما نسع سيله يعله دقيشه
وكل الحفاير بالغوارب طماها

والا المطر بالمتن محلا طشيشه
لا صرت بظلال الصلال وذراها

يرقص على عزف الهبايب حشيشه
ريح المطر يجلي عن النفس داها

والطير غرد وأغرق الغيث ريشه
والبل ترازم يوم ربي عطاها

ومقيال قيظٍ في الخريق وعريشه
يجلي عن النفس الشقيه شقاها

جوٍ عليلٍ نادرٍ مانعيشه
ياكود بسطنبول والا كماها

عساك ياطير نفر من عشيشه
ترجع وجناحانك تعانق هواها