بسم الله الرحمن الرحيم


في البدايه احب اقدم شكري وحبي واحترامي لجميع كتاب هاذا المنتدى والذين اعتبرهم زملاء عمل واعتذر عن التقصير في التواجد اليومي او الاسبوعي على الاقل ..


موضوع بدل السكن اعلم انه الشغل الشاغل لجميع موظفي مؤسسة البريد وهو حق من حقوقهم ونعلم ايضا ان مؤسسة البريد تعمل بكل جهد واخلاص من اجل الرقي بالخدمات البريديه والتي تعود بنفعها على المؤسسه والمواطن والموظف ويشكر الجميع على جهودهم واخلاصهم من اداره وموظفين ..


عندما ياتي احد الكتاب الافاضل ويناشد ويسال عن بدل السكن فهو امر طبيعي لكل موظف لديه حق لابد ان يمنح هاذا الحق ولن يستطيع احد منعه من الحصول على حقه ..


اتمنى حقيقه ان تكون هناك شفافيه ووضوح من قبل ممثلي المؤسسه عن بدل السكن فلن يخسرو الوقت ولا الجهد فالامر عباره عن خطاب يوضح فيه جميع ملابسات هاذا الموضوع والي الكثير بنا عليه امال كبيره وياليت المؤسسه ماقالت فيه بدل سكن كان احسن والناس مابنت عليه امال ..


الي يحز في خاطري ونفسي كموظف اذا جاك كل يوم مشرف ولا مدير اداره وقام يتفلسف علينا يعني واحد يجي يقول ترى اي يوم غياب راح يخصم من بدل السكن وواحد يجي يقول الي مايشتغل ترى مافيه بدل سكن وواحد يجي يقول الدكتور بنتن يقول موظفي البريد مايستاهلون بدل السكن وواحد يقول ان الدكتور بنتن يقول ماراح يصرف بدل السكن الا للموظفين الاكفاء وواحد يجي يقول وهاذا الي غبني الدعوه ماهيب بدل سكن ترى حتى الراتب يمكن ماتستلمه

(( وش التخلف هاذا ؟؟ ))


بالله عليكم ولا اعمم هاذي عقليات مدراء ؟؟

بالله عليكم هاذي العقليات الي راح تطور البريد ؟؟



ياخي هاذا حقنا ولا علينا من احد وراح نطالب فيه اكبر مسؤل ياخي الدكتور بنتن مع حبي واحترامي له مو هو الي يدفع رواتبها ولا المدراء الي حوله هم الي يدفعون رواتبنا الحكوومه الي تدفع لنا لاتقولون لنا المؤسسه لاني ماعترف فيها لاني ماوقعت معها عقد !!!



لو واحد مننا غاب يوم خصمو عليه يومين غياب لو واحد تاخر ساعه دبلو الساعه ساعتين وكل هاذا على قولتهم تاديب للموظف تشتغل اعياد 10 ايام وتطلب فلوس يجيك حق يومين والباقي يقولون لك خذ بداله ايام وش التخلف هاذا !!

اذكر غبت في يوم من ايام العيد خصمو علي يوم ويوم تاديب يعني حق للموظف ماراح تعطونه ويوم جت الخصميات مافيه اسرع ولا اقسى من الخصومات عليه !!



مع احترامي للجميع ولكن ارفض احد يجي يقول انتم شدو حيلكم وتقدمو بالبريد وبدل السكن بعدين اثبتو وجودكم وش نثبت وجودنا فيه ؟؟


اذا كانت الادارات نفسها والمدراء نفسها والعقليات نفسها ؟؟



تجي تطالب بحقك كموظف ماتلاقي اجابه اراجع شؤون الموظفين بخصوص موضوع الترسيم يقولون ماعندنا خبر كل شسي معتم عليه الي يشوفنا يقول بنصنع قنبله ذريه !!!



احنا موظفين مثل مالبريد يبينا نادي عملنا ونعطيه من وقتنا وجهدنا وتفكيرنا لازم يعطونا حقوقنا مانبي احد يمن علينا هاذا حقنا لو الواحد غاب خصمو عليه ولو الواحد ماداوم ماكان اخذ راتب بالعربي عطني حق وخذ حق



نفسي اشوف خطه للعمل عشان نمشي عليها ونتطور معها لكن للاسف مافيه فالحين في لو الواحد بيروح دورة المياه اعزكم الله قالو له ترى فيها انذار وفصل نفسي نتطور ونفسي ناخذ حق ونعطي حق ..


اعذروني ياخوان على قساوة كلماتي ولكن من جد شي يضيق الصدر صايرين مو في مكان عمل حكومي او مؤسسي لا صايرين كننا نشتغل عند اشخاص اذا زعل عليك الواحد منهم قالك امسك الباب ..



رجااء خاص للمسؤلين وخاصه الدكتور بنتن مع خالص حبنا واحترامنا له وللجميع اتمنى وضع فتره زمنيه ووقت محدد لبدل السكن والشفافيه والوضوح في جميع مايخص البريد من برامج تطويريه وخدمات عشان الموظف يعرف وش له ووش عليه يقدر يساهم ويقدر يفكر ويجتهد لمصلحة الجميع لاني ملاحظ ان البريد فيه تخطيط ولكن لاشخاص محددين بمعنى ان الي يدر المؤسسه كم شخص هو الي يفكرون وهم الي يدرسون وشكلهم يقولون الحين مو فاضين لكم نخلص من الخدمات المهمه عندنا بعدين نتفضى لكم


الله يعين بس ..