اللهم إني صائم !

- سلام عليكم
- أهلا أبو فراس ... كيفك ؟
- الحمدلله ... إنت كيفك ؟
- تعال اقعدلك شوي انقظي وقت للفطور ، ترى انا روحي في مناخيري و شايف الدنيا سيجارة .
- والله معك حق و كمان .... يا حبييييييييبي ... أبو محمد .. أبو محمد خذلك هالشوفة بالله ... شوف كيف بتترقوص و هي ماشيه !
- و لليش بتتلفت هيك حوليها ؟!!
- قلة عصي ... الحق عاللي مطلعها من الدار .
- يا زلمة اذا إمها دايما واقفه عالشباك ، كيف بدها تكون البنت يعني ؟! اللهم اني صائم .
- سيبنا من سيرة الناس .. اللهم اني صائم .
- بالله كيف أبو سعيد بتشوفه ؟
- بطل يبين من بعد ما رسب ابنه في التوجيهي . هاي ثالث مره يخزيه في الحارة .
- بيني وبينك ولاده بوطوا الراس ... كلهم فاشلين .
- ربنا الله الزلمة منيح بس لو انه ما بحكي كثير عالناس .
- الواحد يحكي اللي إله و اللي عليه ، هو منيح بس لو بناته يبطلن تلطيع إحمر و اخظر على وجوههن ، الوحدة بتطلع من الصبح كأنها رايحة عرس !
- و لو بس يفرط ايده شوي و يجيب مدرسين خصوصي لولاده عشان ينجحوا ، ترى هو كحته عالآخر .
- بس حرام ، الرجال محترم و ما عليه حكي ... بس ... خلص بلاش .. اللهم إني صائم .
- فعلا الدنيا رمضان ... اللهم إني صائم .