بالبلدي الفصيح
جاتكم الفيران
فتو.. فتو.. فين راحت البنت دي والا عشان صارت مُدرسة تبغى تتعزز عليا أيوه يحقلها صارت مُدرسة والمدرسة جنب البيت.. ايوه يبويا ايش في.. اوو ان شاء الله حلقي انشقر وانا بزهم عليكي ياللا بسرعة انزلي انت وامك عشان نروح البحر بالسيارة الجديدة.. طيب طيب نلبس العبايات وننزل.. وركبوا السيارة وقالت أم فتو يا سلاااام على السيارة الجديدة لما تمشي وتكون الشوارع مسفلتة ومرصوفة ومنورة مو زي زمان كل الشوارع في البلد حفر ومطبات.. ايوه الحمد لله خلاص ايام زمان ولت وعشان كده انا اشتريت السيارة الجديدة كل شي اتغير المدارس صارت كلها مباني حكومية وعلى شوارع رئيسية تشوفي المدرسة ينشرح صدرك فصول كبيرة وملاعب مو زي أول مباني مستأجرة ومحشورة في كل زقاق.. والمدرسات صارت الوحده منهم تلاقي المدرسة اللي تبغاها قدام بيتها مو زي زمان عشان تنقل يبغالها 10 سنين هدا غير المستشفيات الحكومية والمراكز الصحية اللي بتقدم كل الخدمات الطبية الممتازة لأهل البلد.. حتى المتخرجين من الجامعات والكليات والمعاهد الصحية والصناعية صاروا يلقوا الوظيفة من يوم ما يتخرجوا مو زي زمان حتى العنوسه في البلد صارت قليله لانه خلاص شباب البلد كلهم موظفين وكل بنت بيجيها نصيبها لانه السعودة ماشيه مزبوط.. حتى فواتير الكهرباء والتلفون والجوال صارت برسوم رمزية والمويه كمان صارت ما تنقطع زي زمان حتى ما صرنا نشوف وايتات المجاري.. قوم يبو فتو قوم اصحى.. وصلنا البحر.. بحر ايه انت التاني شكللك اتجننت والا جرى لعقلك حاجة قوم شوف الفيران يا كترها في المنور.
قمت زي المفجوع ايش تبغي مني يا شيخة جننتي اهلي حتى في النوم تقلقيني.. قوم شوف حل للفيران هادي حيجينا الطاعون بسببها ومن كبرها العراري بتشرد منها.. هيه لحقت توصل للبلد ما هو كفاية عندنا حمى الضنك والغربان.. لكن ما اقول الا الله يسامحك يا ام فتو صحيتيني من احلى نومة واحلى حلم.
